Notum málið

Verkefnið NOTUM MÁLIÐ er vitundarvakning á stöðu íslensku í Mýrdalshreppi. Verkefnið er samstarfsverkefni sveitarfélags Mýrdalshrepps, Enskumælandi ráðs, Ísí íslenska og Kötluseturs. Verkefnið er partur af því sem við viljum kalla samfélagslega íslensku fræðslu fyrir nýbúa. Í Mýrdalshreppi búa yfir 67 % manns sem ekki hefur íslensku að móðurmáli. Það er ekki einungis á ábyrgð þeirra sem hingað flytja að læra íslensku, það er á ábyrgð okkar allra að halda íslenskunni við og skapa góð skilyrði til þess að íslenska sé notuð. Tilgangur verkefnisins er að fá fyrirtæki í lið með okkur til þess að efla íslensku og íslensku kennslu. Bæta stöðu íslensku bæði á vinnustaðnum sem og út í samfélaginu. Við viljum vekja athygli á Málstefnu Mýrdalshrepps og stefnu stjórnvalda þegar kemur að íslenskri tungu. Við viljum virkja starfsfólk til þess að nota íslensku í sínu daglega lífi, vinnunni og sem oftast. Við viljum fá fyrirtæki í lið með okkur, fyrirtækið velur einhvern frá sér sem heldur utan um verkefnið á sínum vinnustað, sér um samskipti við verkefnastjóra og að þetta verkefni fái að blómstra á vinnustaðnum. Það er alltaf hægt að leita til verkefnastjóra um upplýsingar og ráðgjöf sem tengist verkefninu.

Verkefnalýsing

Hvernig er best að halda utan um verkefnið á vinnustaðnum?

Verkefnastjóri inngildingar og íslensku kemur í heimsókn í fyrirtæki til að kynna verkefnið og öll fyrirtæki fá gefins bolla/mál sem hægt er að nota á kaffistofunni til þess að vekja athygli á því hversu mikilvægt það er að nota málið og ekki síst til þess að minna okkur á það að setjast niður með eitthvað í bolla og spjalla saman er gott fyrir alla og getur haft góð og róandi áhrif á andlega líðan fólks. Það eflir samkennd og seiglu starfsfólks fyrirtækis ef það er góður andi á vinnustaðnum og samskiptin eru góð. Það opnar dyr fyrir erlent starfsfólk að æfa íslensku á vinnustaðnum. Við viljum með þessu skapa öruggt umhverfi á hverjum vinnustað þar sem tími og tækifæri gefst til þess að læra a.m.k eitt orð á dag/viku. Við hvetjum vinnustaði til að velja eitt orð á dag/viku og hengja upp á vegg á kaffistofunni og þetta orð getur svo verið til umræðu og notað þann daginn eða þá vikuna. Með þessu er hægt að læra allt að 300 ný orð á ári og það munar um minna. Við viljum gera það auðvelt að tileinka sér eitt og eitt orð á íslensku yfir árið og það safnast þegar saman kemur en einnig viljum við minna okkur öll á að íslenska er okkar þjóðartunga og hana ber að virða og varðveita á hverjum degi. Það er okkar sameiginlega verkefni, okkar allra sem hér búum og störfum.

Við hvetjum öll fyrirtæki til þess að nota fyrst og fremst íslensku til merkinga.

Við hvetjum fyrirtæki til þess að kynna sér  málverndarstefnu þar sem yfirlýst aðalmarkmið stefnunnar er

,, að tryggja að íslenska verði notuð á öllum sviðum íslensks samfélags.’’

Einnig lög um íslenska tungu (61/2011) þar sem kemur fram að Íslenska er opinbert mál á Íslandi sem ber að varðveita og efla.

Einnig munum við bjóða upp á hitting fyrsta miðvikudag í hverjum mánuði kl 20 – 21:30 á Hótel Vík. Erum við eigendum og starfsfólki á Hótel Vík innilega þakklát fyrir þeirra frábæra framlag og þátttöku í þessu verkefni. Hótel Vík hefur boðið upp á stað sem og Kaffi, te og kex.

Þetta spjallkvöld er til þess að fólk fái tækifæri til að hittast, spjalla og nota íslenskuna á öruggum stað í góðum hópi. Allir velkomnir. Við munum einnig standa að fleiri viðburðum yfir árið þar sem við t.d. spilum, lesum bækur, lesum ljóð, syngjum á íslensku, prjónum, föndrum, borðum og fleira skemmtilegt sem gæti eflt samkennd í samfélaginu yfir árið. Allir ættu að geta fundið eitthvað við sitt hæfi. Við auglýsum þessa atburði þegar nær dregur hverjum og einum. Allir þessir viðburðir fara fram á íslensku til þess að efla íslenskan orðaforða nýbúa. Þessir viðburðir fara fram víðsvegar um sveitarfélagið og verða a.m.k fjórir yfir árið. Það má endilega koma með tillögur að viðburði og staðsetningu, við erum opin fyrir góðum hugmyndum þar sem þetta er lifandi og fjölbreytt verkefni.