Ljósm. Harpa Jónsdóttir

Hjá besta presti í heimi (fyrirsögnin) Greinin er eftir gun@frettabladid.is
Þeir Ríkharður Sigurjónsson og Marinó Freyr Steinþórsson eru meðal þeirra átta drengja sem fermast í Mýrdalnum í vor.  Þeir hafa verið vinir frá því þeir muna eftir sér og eru báðir í hljómsveitinni Enter.

"Við höfum þekkst frá fæðingu.  Það er bara einn dagur á milli okkar og mæður okkar voru saman á fæðingardeildinni," segja þeir Marinó Freyr og Ríkharður glaðlega.  Ekki hafa þeir þó alltaf getað hist daglega því Marinó Freyr á heima á Brekkum en Ríkharður í Vík og Reynisfjallið er þar á milli.  Báðir stunda nám í Víkurskóla og nú í vetur hafa þeir verið saman í fermingarfræðslu ásamt sex drengjum öðrum, hjá séra Haraldi Kristjánssyni sem þeir segja besta prest í heimi.  "Hann er einn sá fyndnasti sem er hægt að þekkja," segja þeir og láta af því að fermingarfræðslan hafi verið skemmtileg.  Lofa samt að hlæja ekki í kirkjunni enda verði hátíðleikinn þá í fyrirrúmi.  Þeir fermast heldur ekki saman því þeir tilheyra hvor sinni sókninni.  Ríkharður verður á undan að komast í kristinna manna tölu.  Hann fermist í Víkurkirkju 18. apríl og Marinó Freyr í Skeiðflatarkirkju 24. apríl.  Þetta þýðir að þeir geta verið í veislum hvor hjá öðrum.  Það er mikið um að vera hjá þeim vinunum Ríkharði og Marinó Frey.  Þeir spila saman í hljómsveitinni Enter, ásamt Reyni Mána Orrasyni, sem á heima að Götum í Mýrdal og er ári yngri.  Enter tók þátt í Músíktilraunum fyrir fáum dögum og drengirnir voru að koma af æfingu þegar í þá náðist síðasta miðvikudag því annað gigg var framundan.  Það var í Laugalandi í Holtum, þar sem margir skólar sameinuðust á fimmtudagskvöldi á stóru árshátíðarballi.  "Hver skóli á að koma með atriði og við í Enter erum fulltrúar Víkurskóla.  En Veðurguðirnir eru aðalhljómsveitin á ballinu," upplýsa þeir.
Hljóðfæraskipan er þannig í Enter að Ríkharður er á trommunum, Marinó Freyr á bassa og Reynir Máni sér um gítarleik og söng.  Þeir þremenningar hafa spilað saman í eitt ár og komið fram á nokkrum tónleikum á Suður- og Suðausturlandi.  Ríkharður á trommusett heima hjá sér og aðspurður segir hann nágrannana ekkert hafa kvartað undan hávaðanum.  Hann hefur verið nemandi í nokkur á við tónlistarskólann í Vík.  Marinó Freyr er líka í þeim skóla og kveðst jafnvígur á bassa, gítar og trommur.  Kennari þeirra er Kristinn Níelsson. En þar sem þetta er viðtal á fermingarsíðu þá lýkur því á kristilegum nótum eins og viðeigandi er.  Eru þeir félagar farnir að læra eitthvað fallegt utanbókar fyrir hina helgu athöfn? "Já, trúarjátninguna.  Við eigum að velja okkur ritningarorð í næsta tíma hjá séra Haraldi til að fara með í kirkjunni.  Svo vorum við að læra sálminn Son guðs ertu með sanni."
gun@frettabladid.is

Sjá fréttablaðið í heild.  Viðtalið er á fermingarsíðu blaðsins nokkuð neðarlega