Mýrdælingur heiðraður á Stokkseyrarbryggju

Stokkseyrarbryggja hefur á síðustu fimm árum fengið nýtt og verðugt hlutverk eftir að útgerð lagðist þar af síðla á síðustu öld og færðist til Þorlákshafnar.

Nú er Stokkseyrarbryggja vettvangur mannlífs og menningar af ýmsu tagi eftir að Hrútavinafélagið Örvar á Suðurlandi fann bryggjuna í fjörunni, gleymda flestum og tóku Hrútavinir bryggjuna í fóstur og eiga hana nú skuldlausa með öllu og án veðsetninga. Glæsilegt Svið hefur verið byggt á bryggjunni sem þolir veður og brim að vetri. Þá er fremsti hluti bryggjunnar lendingarstaður fyrir þyrlur Landhelgisgæslunnar þegar við á.

Hápunktur mannlífs á Stokkseyrarbryggju á sumri hverju er Bryggjuhátíð í júlí sem í ár var óvenju vegleg þar sem Bryggjuhátíðin var fimm ára og Hrútavinafélagið fagnar 10 ára afmæli sínu á þessu ári.

Á Bryggjuhátíðinni í ár heiðraði Hrútavinafélagið mann og annan eins og félagið á vana til alls tuttugu manns. Tíu Stokkseyringa fyrir ýmis störf í Stokkseyrarsamfélaginu síðustu ár og áratugi. Síðan voru heiðraðir tíu einstaklinga fyrir mannlífs- og menningarstörf Hrútavina á tíu ára starfstíma Hrútavina 1999 – 2009.

Meðal þeirra var Mýrdælingurinn Kristinn Jóhann Níelsson skólastjóri Tónlistarskóla Mýrdælinga í Vík í Mýrdal; fyrrum skólastjóri Tónlistarskóla Önundarfjarðar og Tónlistarskóla Bolungarvíkur. Mætti Kristinn til Bryggjuhátíðar með Hljómsveitinni GRANÍT í Vík og léku þeir á fjölmennu Bryggjuballi.

Í lokin voru þeir gerðir að sérstakri hljómsveit Hrútavina og heita nú; Hrútavinabandið- GRANÍT og munu þeir taka virkan þátt í mannlífi Vestfirðinga á Suðurlandi og víðar næstu misseri.

Hér má sjá myndband frá Stokkseyrarbryggju er Hrútavinabandið-GRANÍT flytur lokalagið á Bryggjuballinu. Það er norska sigurlagið frá Euróvison í vor með staðbundnum texta eins og heyra má.