Vísitasía biskups Íslands í Skaftafellsprófastsdæmi.

Biskup Íslands, herra Karl Sigurbjörnsson vísiterar Skaftafellsprófastsdæmi dagana 18. - 25. ágúst nk.
Síðast vísiteraði herra Ólafur Skúlason, þáverandi biskup Íslands, Austur- og Vestur-Skaftafellssýslur, árið 1994.

Biskup heimsækir kirkjur og söfnuði og kynnir sér kirkjulegt starf í Skaftafellssýslunum báðum.
Á öllum kirkjum verða helgistundir eða guðsþjónustur eftir atvikum, ásamt fundum með sóknarprestum, sóknarnefndum og starfsfólki safnaðanna. Biskup heimsækir einnig dvalar- og hjúkrunarheimili aldraðra þar sem þau eru og vonast einnig eftir að fá að hitta börnin í söfnuðunum, ýmist í skólunum eða kirkjunum, eftir aðstæðum.
Með biskupi í för verður eiginkona hans frú Kristín Guðjónsdóttir, prófastur Skaftafellsprófastsdæmis, séra Haraldur M. Kristjánsson í Vík og eiginkona hans, frú Guðlaug Guðmundsdóttir.
Sóknarfólk í prófastsdæminu er hvatt til að mæta í kirkjur sínar og fagna góðum gestum.

Vísitasían hefst í Bjarnanesprestakalli í Austur-Skaftafellssýslu,
og verður dagskráin þar sem hér segir:
Hoffellskirkja í Nesjum, laugardagurinn 18. ágúst kl. 13:00.
Bjarnaneskirkja í Nesjum, 18. ágúst , kl. 16:00.
Hafnarkirkja, sunnudagurinn 19. ágúst, kl. 14:00.
Stafafellskirkja í Lóni, 19. ágúst, kl. 20:00.

Í Kálfafellsstaðarprestakalli sem hér segir:
Kálfafellsstaðarkirkja, mánudagurinn 20. ágúst kl. 14:00.
Eftir guðsþjónustuna verður kirkjukaffi á Smyrlabjörgum í tilefni af 80 ára vígsluafmæli Kálfafellsstaðarkirkju.
Brunnhólskirkja á Mýrum, mánudaginn 20. ágúst kl. 21:00.
Hofskirkja í Öræfum, þriðjudaginn 21. ágúst, kl. 14:00.

Í Kirkjubæjarklaustursprestakalli sem hér segir:
Bænhúsið að Núpstað, þriðjudagurinn 21. ágúst, kl. 17:00.
Kálfafellskirkja í Fljótshverfi, 21. ágúst, kl. 18:30.
Minningarkapella séra Jóns Steingrímssonar á Kirkjubæjarklaustri, 21. ágúst, kl. 21:30.
Prestsbakkakirkja á Síðu, miðvikudagurinn 22. ágúst, kl. 16:00.
Langholtskirkja í Meðallandi, 22. ágúst, kl. 21:00.
Grafarkirkja í Skaftártungu, fimmtudagurinn 23. ágúst, kl. 14:00.
Þykkvabæjarklausturskirkja í Álftaveri, 23. ágúst, kl. 20:00

Í Víkurprestakalli í Mýrdal verður dagskráin sem hér segir:
Reyniskirkja, föstudaginn 24. ágúst, kl. 20:30.
Skeiðflatarkirkja, laugardaginn 25. ágúst, kl. 14:00.
Sólheimakapella, 25. ágúst, kl. 16:30.

Heimsókn biskupshjónanna lýkur svo í Vík í Mýrdal með guðsþjónustu í
Víkurkirkju, laugardaginn 25. ágúst, kl. 20:00.

Börnin eru sérstaklega hvött til að koma með foreldrum sínum og forráðamönnum í sóknarkirkjur sínar þegar biskup heimsækir þær.
Fólk í Skaftafellssýslum er vinsamlega beðið um að kynna sér vel dagsetningar og tímasetningar atburðanna og fylgjast með auglýsingum og tilkynningum sóknarnefnda sinna og sóknarpresta.

Haraldur M. Kristjánsson
prófastur Skaftafellsprófastsdæmis