Ilmur af heitu súkkulaði lá í loftinu þegar dagskráin hófst með almennum söng "Við kveikjum einu kerti á". 
Þá var fluttur "Lítill jötuleikur" (Höf: Susanne Baadh / ísl. þýð: Sig. Ingólfsson)
Þar stigu á svið 3. - 6. bekkur og flutti á ógleymanlegan hátt djassskotinn helgileik undir stjórn Önnu Björnsdóttur.
Sr. Haraldur M. Kristjánsson las jólasögu "Piparkökurnar hennar Maríu meyjar" eftir Edith Unnerstad.
Þórhildur St. Kristinsdóttir (dóttir Kristins tónskólastjóra) lék á píanó Í bljúgri bæn.
Gítarjólarokk skemmtileg útsetning á ýmsum jólalögum var í flutningi þeirra feðga Kristins og Ragnars.
Meiri snjór og Hringi klukkurnar í kvöld rokkuðu Björn Þór Ólafsson á gítar, Guðm. Kristinn Haraldssson á trommur og Sölvi Hrafn Sveinsson á gítar.
Sameiginlegur kór Skeiðflatar- og Víkurkirkju undir stjórn Önnu Björnsdóttur flutti Fjárhús lágt, Jól yfir borg og bæ og Á dimmri nóttu, í því lagi lék Andrína Erlingsdóttir undir á þverflautu sem setti óneitanlega glæsilegan svip á lagið.
Undirleikari á píanó var Kristín Björnsdóttir.
    Sr. Haraldur var með ritningarlestur og bæn og var síðan endað með almennum söng Nóttin var sú ágæt ein.
Að lokinni dagskrá var viðstöddum boðið að þiggja veitingar í boði allra kirkna og kvenfélaga í Mýrdal.
Eftir veitingar og spjall var gengið út til að kveikja á jólatré okkar Mýrdælinga sem nú er staðsett á grasblettinum sunnan við KB banka.
    Margmenni var á hátíðinni og gaman að sjá hve margir sáu sér fært að koma og njóta góðrar stundar.