Helga Guðrún Guðjónsdóttir, formaður UMFÍ setti 11. Unglingalandsmótið í Þorlákshöfn í glæsilegri setningarathöfn  að viðstöddu miklu fjölmenni. Keppendur, sem voru um 1200 talsins, gengu fylktu liði inn á völlinn í mildu veðri.
Innganga félaga USVS var hin glæsilegasta og fyllti marga stolti. Hlerað hefur verið að USVS hafi verið eitt af þremur samböndum sem báru af hvað varðar heildarmynd og prúðmennsku. Þorsteinn Björn Einarsson bar skilti USVS fremstur í fylkingunni og fánaberi var Sveinn Þórðarson með dyggri aðstoð Breka Þórs Sveinssonar og Guðmundar Elíassonar.  Yngstu félagarnir gengu svo á eftir fánabera og gönguna ráku svo yfirsmalarnir Svanhvít M. Sveinsdóttir og Inger Schiöth.
Keppendur stóðu sig frábærlega alla helgina. Og flestir bættu sín persónulegu met. Veðrið var með besta móti, föstudagurinn bar með sér sól og blíðu en svo dró fyrir sólu en blíðan hélst að mestu.
USVS gat lagt HSK lið í starfsmannamálum og stóðu Þorgerður Einarsdóttir og Sædís Íva Elíasdóttir vaktina í skráningu úrslita alla helgina.  Sveinn Þórðarson var gerður að langstökksstjóra og Inger Schiöth hljóp í nafnakallið og langstökkið. Skorað var á Jóhann V. Hróbjartsson að vinna með spjótkastinu á sunnudeginum og var hann ekki lengi að taka við sér.
Unglingalandsmótin eru hreint og klárt komin til að vera.

Ljósmyndir: Guðný Sigurðardóttir