Fundargerð 142. fundar skipulags- og byggingarnefndar frá 21. júní 2007.
Á fundinum var m.a. fjallað um veglínur, göngu- og reiðleiðir vegna aðalskipulags.  Fyrir lá bréf Vegagerðarinnar þar sem gerðar eru tillögur að nýjum veglínum Hringvegar um Mýrdal, en Mýrdalshreppur hafði óskað eftir að Vegagerðin skoðaði nánar tvær veglínur í samráði við Umhverfisstofnun og Siglingastofnun, aðra sunnan byggðar í Vík og sunnarlega um Reynishverfi og hina um núverandi veg gegnum Vík, um göng við Borgarhól og norðarlega um Reynishverfi.
Vegagerðin gerir tvær tillögur að veglínum sem falla reyndar saman á vestari hluta svæðisins.  Skipulags- og byggingarnefnd telur að tillaga Vegagerðar um að fara með veginn um Reynisdal sé óásættanleg og var sammála um að tekin yrði afstaða milli veglína 5 og 6 á fyrirliggjandi uppdrætti.  Þrír greiddu atkvæði með línu 5 og tveir með línu 6. 
Skipulags- og byggingarnefnd er þar með sammála um að leggja til að veglína 5 verði færð inn á aðalskipulagstillögu til umfjöllunar og afgreiðslu, þó með þeirri breytingu að fylgt verði tillögu Vegagerðarinnar vestan Brandslækjar. 
Sveitarstjórn samþykkir að tillaga skipulags- og byggingarnefndar um veglínu verði tekin sérstaklega til afgreiðslu.
Tillagan er samþykkt með þremur atkvæðum (EE, KP, BJ) gegn tveimur (SP, ÞJ).

Sveinn og Þórhildur leggja fram bókun:
Undirrituð greiða atkvæði gegn tillögu skipulags- og byggingarnefndar vegna eftirfarandi:
- Tillagan uppfyllir ekki markmið sem sett voru fram í greinargerð starfshóps um vegamál í Mýrdal frá árinu 2005 um að nýr vegur fari yfir sem minnst af ræktunarlandi en jarðir eru flestar litlar og ræktunarland því dýrmætt.  Verði tillagan að veruleika er dýrmætu ræktunarlandi fórnað.
- Ekki er tekið nægjanlegt tillit til athugasemda sem fram hafa komið vegna umhverfissjónarmiða, veglínan liggur um eða við svæði sem eru á náttúruminjaskrá.
- Við erum sammála tveimur nefndarmanna skipulags- og byggingarnefndar sem telja veglínu 6, um jarðgöng við Borgarhól og um norðanvert Reynishverfi þann kost sem best samrýmir umhverfis-, landnýtingar- og umferðaröryggissjónarmið.  Við teljum að unnt sé að ná fram verulegum úrbótum á öryggi vegfaranda og þeirra sem við veginn búa án þess að fórna náttúruverðmætum eins og tillagan gerir ráð fyrir.  Þetta má gera t.d. með því að koma upp hringtorgum beggja vegna Víkur, lækka hámarkshraða, bæta gangbrautir og merkingar og hugsanlega koma upp göngubrú yfir veginn.
Sveinn Pálsson
Þórhildur Jónsdóttir

Björgvin leggur fram bókun:
Undirritaður greiðir atkvæði með tillögu skipulags- og byggingarnefndar, en vildi sjá veglínuna sunnar í Reynishverfi, eins og tillaga 2 býður upp á. Með því að fylgja nokkurn veginn norðanverðum ósbökkum Dyrhólaóss og svo áfram með göngum í gegnum Geitafjall, er hægt að halda veginum nokkuð beinum, komið er í veg fyrir frekara landbrot og sú leið hlífir betur ræktunarlandi bænda í Reynishverfi. Þessi leið tel ég að þjóni best hagsmunum heildarinnar.
Björgvin Jóhannesson

B-listinn leggur fram bókun:
Fulltrúar B- listans telja að raunhæfasta veglínan sé tillaga 5 sem  Skipulags- og byggingarnefnd sammælist um og samþykkti á fundi sínum 21 júní sl.  Þessi tillaga 5 að veglínu samrýmist jafnframt mjög tillögu Vegagerðarinnar (sbr bréf dags. 5. júní) en er færð suður fyrir megin byggðina í Reynishverfi.
Til framtíðar litið er afar óskynsamlegt að  hringvegurinn liggi í gegnum íbúðabyggðina í Vík og áfram í gegnum jarðgöng í Borgarhóli, slíkt hefði í för með sér mikið raski í og við byggðina í Vík og eyðileggur verðmætt byggingarland. Gagnamunni vestan við Reynisfjall sem lægi norðan Hnúksins við Reyni lægi  mjög nærri mannvirkjum og jafnframt yrði áfram viðvarandi mjög mikil umferð um  bæjarhlöð bæjanna Lækjarbakka og Reynis.
Með veglínu 5 verður minnst rask fyrir núverandi byggð og minnstar skemmdir á landi.
Elín Einarsdóttir
Karl Pálmason.

Fundargerðin að öðru leyti samþykkt.