Spennan magnast þessa dagana í Mýrdalnum en þann 30. apríl nk. fer fram söngvakeppnin Raularinn á Hótel Höfðabrekku.
Þetta er í 11. skipti sem þessi skemmtilega keppni fer fram og alltaf er hún haldin á þessum degi.
Iðulega leggja menn mikið í gott "show" enda er besta atriðið verðlaunað, bestu búningarnir (Besta sviðsframkoman) og besti umboðsmaðurinn.

Að sjálfsögðu hlýtur sigurvegarinn síðan titilinn „Besti raularinn“ og ber hann fram að næstu keppni.
Hljómsveitin Granít hefur spilað undir á öllum Raularakeppnunum auk þess að leika fyrir dansi eftir keppni. Sunnlenska tók á dögunum hús á gítarleikara hljómsveitarinnar, Sveini Pálssyni, sveitarstjóra Mýrdalshrepps og forvitnaðist um þessa „stálpuðu“ hljómsveit.

„Þessi hljómsveit er nú komin til ára sinna en þrír af okkur hafa spilað saman frá því að við vorum unglingar,“ segir gítarleikarinn Sveinn. Með honum í hljómsveitinni er Bárður Einarsson bassaleikari, Guðmundur Pétur Guðgeirsson trymbill og Hróbjartur Vigfússon sem einnig leikur á gítar.
„Þetta er nú bara tómstundagaman hjá okkur, þetta er eitthvað sem við gerum í stað þess að spila bridds yfir vetrartímann. Við höfum spilað á öllum Raularakeppnunum og einstaka sinnum á öðrum skemmtunum en við gerum þetta meira okkur til gamans.“
Sveinn segir hljómsveitina vera trúa gamla góða rokkinu en þeir hafi þurft að fást við mjög fjölbreytt verkefni á Raularakeppnunun.
„Þetta hefur verið alveg frá gömlum ballöðum yfir í harðkjarna rokk, en við höfum alltaf komist í gegnum þetta þrátt fyrir einfalda hljóðfæraskipan.
Við áskiljum okkur rétt til að hafna lögum en höfum aldrei þurft að gera það. Við gerum þetta bara á okkar hátt og með okkar hljómi og það hefur fallið í góðan jarðveg. Yfirleitt fáum við ekki langan tíma til að æfa og oft er töluvert á sig lagt til að ná sumum lögunum en alltaf hefst þetta á endanum.“