Búast við auknu sandfoki

Vegna landbrots í Víkurfjöru færist sjórinn tíu metra í átt að húsum í Víkurþorpi á ári.  Styttist í íþróttavöllinn.

Eftir Helga Bjarnason
helgi@mbl.is

Íbúar í Vík í Mýrdal mega búast við auknum ágangi sands á næstu misserum með tilheyrandi tjóni á mannvirkjum og óþægindum.  Að óbreyttu mun sjórinn brjóta sér leið að íþróttavellinum eftir nokkur ár.
    Landrof hefur verið mikið í Víkurfjöru síðustu áratugi vegna ágangs sjávar.  Rofið hefur að jafnaði verið 8-10 metrar á ári sem er með því mesta sem þekkist á jörðinni.  Landgræðslan hefur unnið mikið að uppgræðslu til að hefta sandfok og lagt tugi milljóna í það.
    Í minnisblaði sem Sveinn Runólfsson landgræðslustjóri og Gústav Ásbjörnsson héraðsfulltrúi tóku saman fyrir sveitarstjórnina eru ítrekaðar viðvaranir Landgræðslunnar vegna sandfokshættu í Vík.
    Fjöruborðið er að nálgast fljóðvarnagarðinn sem byggður var 1995  og þegar skörð koma í hann verður fátt um varnir.  Fram kemur að vegna þess hversu lítið landrými er orðið eftir á milli fjöru og byggðar sé nær ógerlegt að koma í veg fyrir sandfok inn í byggðina.
    Sandfok var síðast í Víkurþorpi s.l. þriðjudagskvöld. "Það er eins og að vera í sandstormi á Mýrdalssandi, þegar þetta gengur yfir.  Maður getur ekkert gert." segir Bryndís F. Harðardóttir sem býr við neðstu götuna í Vík.  Hún segir að sandurinn smjúgi alls staðar inn.  Þrífa þurfi húsið og umhverfið og mála árlega.
    Unnið hefur verið að undirbúningi sjóvarna.  Til hefur staðið að verjast sjónum við svokallaðan flóðvarnagarð sem er skammt sunnan við þorpið.  Margir íbúar vilja verjast sunnar, í núverandi fjöruborði, og eiga meira svæði til að stoppa sandinn.  Einnig hefur umræða um lagningu nýs vegar um Mýrdal áhrif því mikill fjöldi íbúa Víkur vill færa veginn í fjöruna.  Ekki verður nægilegt pláss fyrir veginn ef sjóvarnagarðurinn verður byggður samkvæmt núverandi áætlunum.  Áformað var að hefja framkvæmdir í ár en ekki fékkst fjárveiting.  Sveinn Pálsson sveitarstjóri segir það slæmt.  Tekin sé viss áhætta með því að fresta framkvæmdum því þótt landbrotið sé 8-10 metrar að meðaltali á ári geti komið stór áföll við vissar aðstæður.  Vonast hann til að fjárveiting fáist til að byrja á næsta ári.