Tekið úr MBL miðvikudaginn 11. mars s.l.
Eftir: Ingveldi Geirsdóttir ingveldur@mbl.is

Syngja Dolly og Jackson

Nemendur ML setja upp Með fiðring í maga

"Verkið gerist á einu sumri og fjallar um stelpur og stráka sem eru saman í sönghóp, aðalparið í hópnum hættir saman og tvístrast þá hópurinn með tilheyrandi dramatík og gamni," segir Eydís Inga Valsdóttir formaður árshátíðarnefndar Mímis, nemendafélags Menntaskólans að Laugarvatni, um leikritið Með fiðring í maga sem nemendur skólans frumsýna á föstudaginn.

Leikritið er byggt á gamalli íslenskri bíómynd en Eydís vill ekki gefa upp hvaða mynd það er því áhorfendur eiga að komast að því sjálfir.  Handritið er skrifað af leikstjóranum Jóhönnu Friðriku Sæmundsdóttur og Heru Sigurðardóttur.  Leikhópurinn hefur svo í samvinnu við leikstjórann gert handritið að sínu.

Eydís segir Með fiðring í maga vera tímalaust þó kvikmyndin sé höfð nokkuð gamaldags en verkið gerist til að byrja með í Reykjavík, fer síðan á Jökulheima, í Húnaver og á Gaddstaðaflatir.  Það eru ekki minni stjörnur en Dolly Parton og Michael Jackson sem eiga flest lögin í verkinu.  Textarnir við lögin voru íslenskaðir af leikstjóranum fyrir utan textann við "Stand by your man" sem fenginn er að láni hjá kántrísveitinni Klaufunum sem hefur einnig lánað karlkyns leikurum í verkinu kúrekastígvélin sín.

Enn ein Hara-systirin
25 nemendur leika í leikritinu ásamt 6 manna hljómsveit.  En allt í allt koma um 35 manns að leiksýningunni.  Eydís segir að 60 manns hafi sóst eftir að leika í verkinu sem verður að teljast mjög gott í tæplega 150 manna skóla.  Með aðalhlutverk fara Árni Benónýsson og Regína Lilja Magnúsdóttir sem er systir Hildar og Rakelar sem hafa kallað sig Hara-systur og komu nýverið fram í Söngvakeppni Sjónvarpsins í rokkgrúppunni Elektru.
Með fiðring í maga verður forsýnt fyrir íbúa Sólheima í Grímsnesi 12. mars en frumsýning verður í Aratungu á föstudaginn.
Uppselt er á þá sýningu.  Leikhópurinn fer í sýningarferð með verkið um Suðurland og til Mosfellsbæjar í marsmánuði. 
Miðaðantanir í síma 693-2168