20.10.2006
Lögbirtingablaðið til Víkur
Frá og með 1. janúar 2007 verður Lögbirtingablaðið gefið út hér í Vík.  Þetta er liður í að færa opinber störf út á landsbyggðina.
Þá er þetta líka gert til að renna styrkari stoðum undir starfsemi embættis sýslumannsins í V-Skaft en yfirstjórn lögreglunnar hverfur frá embættinu í Vík til sýslumannsins á Hvolsvelli þann 1. janúar 2007.  
Í símtali við Kjartan Þorkelsson sýslumann á Hvolsvelli staðfesti hann að löggæslan í Vík og á Klaustri breytist ekkert við þessa tilfærslu, áfram verði lögreglustöð á báðum stöðum.
Þvert á móti komi þessi breyting til með að efla löggæsluna ef eitthvað er. 
Á dögunum var auglýst eftir fulltrúa ritstjóra Lögbirtingablaðsins.  Ritstjóri blaðsins er sýslumaður okkar V-Skaftfellinga, Anna Birna Þráinsdóttir.  Að sögn Önnu Birnu sóttu 3 einstaklingar um stöðuna.
Gengið verður frá ráðningu Guðrúnar Hildar Kolbeins á næstu dögum. Starfsþjálfun Guðrúnar Hildar fer fram í Reykjavík í nóvembermánuði.
Tilgangur Lögbirtingablaðsins er að birta ýmsar tilkynningar frá stjórnvöldum s.s.ýmsar tilkynningar vegna gjaldþrotaskipta, kaupmála, nauðungarsölu fasteigna, félög og firmu.
Hinn almenni borgari getur verið áskrifandi hvort sem er á rafrænu eða prentuðu formi.
Sjá nánar www.logbirtingablad.is